Fryma poetike e së dielës me poetin;Kujtim HAJDARI

NUK BESOJ SE IKE

 (Artistes së madhe Margarita Xhepës)

————————————————-

”S’mundem dot më, po më lënë forcat Kujtim,

Po dëshira e madhe nuk më lë ende”

Dëgjoja zërin tënd me admirim,

Dhe nuk besoj, më duket si hije ëndrre.

Nuk besoj se ike e shtrenjta Margaritë,

E na le neve dhimbjen e rè pikëllimi,

Mbretëreshë e skenës që lëshoje vetëm dritë,

Dhe artit tonë i dhe ngjyra shkëlqimi.

Nuk besoj, më duket ende pranë e pranë,

Në podium bashkë ndjekim konkurrimet,

Prej ngazëllimit vendi nuk të mban,

Zgjedh e reciton me zërin tënd krijimet.

Dhe në perëndim të jetës mbete e rrallë,

Të rënduan vitet po shpirti mbeti i ri,

Dëshirat s’t’u shuan e zemra sa një mal,

Këtij vendi, këtij populli i thure veç lavdi.

S’besoj se ike, Margaritë, mes nesh jeton,

Si yll që rrezaton në qiellin atje lart,

Në veprën tënde do të ndjejmë gjithmonë,

Nderi i kombit, mbretëreshë në art.

/QendraPress/