Një qeveri që ndjell urrejtje, prodhon dhunë!-Shkruan;Gjeneral-Hisen BERISHA

                          Kur qeveria, përmes veprimeve dhe retorikës së saj, kontribuon në një klimë të rrezikshme të ndarjes dhe konfliktit, urrejtjes dhe përçarjes, ka impakt në siguri në kontekst me të gjerë.

Vendimet e diskutueshme dhe me mungesë të ndjeshmërisë ndaj shqetësimeve të qytetarëve nxisin tensione të brendshme dhe minojnë stabilitetin e vendit. Vendimi për rritjen e çmimit të energjisë elektrike me 15% nga prilli i këtij viti ka shkaktuar pakënaqësi të thellë në mesin e qytetarëve dhe bizneseve, të cilët tashmë përballen me vështirësi ekonomike, për shkak të impaktit gjithëpërfshirës që ka.

Nëse në vend që të dëgjojë zërin e qytetarëve, qeveria zgjedh, që para se ta shtypë atë, ta manipulojë shqetësimin qytetar përmes skenarëve recidivë komprometues, sa herë duhet të përballet me ta – qytetarët që guxojnë të kundërshtojnë – tregon se është e padenjë të qeverisë.

Në rastin ilustrativ të rritjes së çmimit të energjisë, qeveria po mundohet t’iu bëjë diversion politik duke manovruar për ta devijuar vëmendjen dhe zbutur reagimin qytetar, pra ta shuajë në embrion.

Arrestimi i protestuesve para zyrave të ZRRE-së është një shembull i qartë i kësaj qasjeje autoritare. Këto veprime jo vetëm që shkelin të drejtat themelore të njeriut, por edhe nxisin më tej ndarjet dhe konfliktet sociale që cenojnë sigurinë edhe ashtu të brishtë. Për më tepër, muajt e parë të këtij viti, pa ndryshuar trend nga vitet e kaluara, kanë shënuar numër enorm të vrasjeve, vetëvrasjeve, dhunës në familje dhe në shoqëri në të gjitha nivelet dhe kategoritë.

Më shqetësuese vazhdon të mbetet siguria në veri. Përkundër faktit se nuk do të mund të jemi imunë nga shfaqja e pakënaqësive me forma veprimi të ndryshme për shkak të influencimit të Beogradit, edhe më tej vërehet se qeveria ka dështuar të adresojë tensionet etnike në veri të vendit. Sulmet e fundit ndaj institucioneve dhe qytetarëve në atë rajon tregojnë për një mungesë të sundimit të ligjit dhe një qasje të dobët ndaj sigurisë kombëtare.

Pra, edhe më tej realiteti flet se atje kemi “zbatim të ligjit pozitiv”, por jemi larg “sundimit të ligjit”, ndërkohë që sovranitet ka vetëm në vijën e kufirit që garantohet nga NATO/KFOR. Politikë e mençur do të ishte që në një konstelacion të tillë rrethanash politike, ekonomike dhe të sigurisë çfarë jemi, qeveria të promovojë dialogun dhe pajtimin. Por, qeveria duket se në vend të kësaj po lejon që urrejtja dhe mosbesimi të rriten, duke rrezikuar stabilitetin e vendit. Është e qartë se një qeveri që ndjell urrejtje dhe përçan qytetarët e saj, nuk mund të sjellë paqe dhe zhvillim.

Kosova ka nevojë për një udhëheqje që promovon unitetin, respektin për të drejtat e njeriut dhe një qasje të drejtë dhe transparente ndaj qeverisjes. Vetëm atëherë mund të shpresojmë për një të ardhme më të ndritur dhe të qëndrueshme për të gjithë qytetarët e Kosovës./QendraPress/