Pesë vrasjet që tronditën Kosovën brenda 10 ditëve

                            Në 10 ditët e fundit, Kosova u trondit nga pesë vrasje.Këto dhjetë ditë vendi përjetoi një valë të trishtuar ngjarjesh të dhunshme, ku katër raste të ndara vrasjesh kanë tronditur shoqërinë dhe kanë lënë pas viktima dhe dhimbje të thella të familjarëve

Këto ngjarje, që lidhen me përdorimin e armëve të zjarrit, kanë ngritur pyetje të mëdha për sigurinë dhe arsyet e pastrimit të tensioneve përmes dhunës.

Ngjarja e parë ndodhi të dielën, më 23 mars, në komunën e Vushtrrisë, ku si pasojë e një mosmarrëveshje mes dy të rinjve të moshës 19 vjeçare, njëri prej tyre mbeti i vdekur në vendngjarje.

Ardit Zymeri, 19 vjeç, mbeti i vrarë nga arma e zjarrit e shkrepur nga bashkëmoshatari i tij, Bleon Dibrani.

Hetimet po vazhdojnë, dhe pista kryesore e hetimit ka të bëjë me një konflikt të nxitur nga xhelozia për një vajzë, një mosmarrëveshje që shkoi deri në përdorimin fatal të armës.

I dyshuari ka pranuar fajësinë gjatë marrjes në pyetje dhe ndaj tij është caktuar masa e paraburgimit për një muaj.

Ende pa u bërë 24 orë nga vrasja e të riut, komuna e Vushtrrisë u tronditë sërish nga një vrasje e dyfishtë.

Pasditja e 24 marsit tmerroi vendin kur Arsim Morina, 58 vjeç, qëlloi për vdekje 42-vjeçaren, Nexhmie Musliu Haradini dhe pastaj qëlloi edhe veten.

Dy viktimat nuk kishin lidhje familjare, por gruaja e ndjerë kishte punuar më herët në furrën “Diellza”, pronari i së cilës ishte Morina.

Sipas një të afërmi të së ndjerës, vrasja dyshohet të ketë ndodhur për arsye xhelozie lidhur me ndryshimin e vendit të punës.

Një ditë më vonë, më 25 mars tronditja vazhdoi.

Një tjetër tragjedi ndodhi, këtë herë në rrugën “Rrustem Hyseni”, në Prishtinë.

Dy persona të armatosur dhe të maskuar kanë shtënë me armë zjarri, duke lënë të vdekur 62-vjeçarin Naser Gashi dhe duke plagosur Miftar Miftarin.

Policia e Kosovës ka identifikuar autorin e dyshuar të këtij akti, Alban Gashi, dhe aktualisht është në kërkim të tij.

Dyshohet se Gashi ka qenë i shoqëruar nga një person tjetër, të cilin policia gjithashtu po e kërkon.

Ndërsa mbrëmjen e së martës më 1 prill, rreth orës 23:30, rreshteri i Policisë së Kosovës, Muhamed Lika, u qëllua për vdekje para banesës së tij në Kaçanik.

Ai u vra në korridorin e banesës së tij, në një zonë të njohur si “Çarshia e Qytetit”.

Ende nuk dihen arsyet e këtij krimi, dhe hetimet janë në vazhdim.

I dyshuari për vrasjen gjendet në arrati, ndërsa Prokuroria e Shtetit dhe Inspektorati Policor i Kosovës po punojnë për të sqaruar rrethanat dhe zbardhur ngjarjen./Arbresh.info/