Sindikata e Administratës Publike kundër shtrenjtimit të rrymës: Çmimet e produkteve bazike rriten ndjeshëm, pagat të ngrira

Rritja e çmimit të energjisë elektrike nxiti reagim edhe të Sindikatës së Pavarur të Administratës Publike, e cila e cilëson këtë vendim si një goditje të rëndë për shërbyesit civilë dhe qytetarët në përgjithësi.

Kryetari i kësaj sindikate, Ali Gashi, tha për Ekonomia Online, se në situatën, kur çmimet e produkteve bazike janë rritur ndjeshëm dhe pagat kanë mbetur të ngrira, ky vendim është i papranueshëm.

“Sikur te çdo qytetar i Kosovës, edhe te zyrtarët publikë, kjo rritje do të ndikojë jashtëzakonisht shumë, duke marrë parasysh që krahas kësaj rritjeje, e cila është e papranueshme për ne, tashmë kemi një rritje të pakontrollueshme të çmimeve bazike dhe paga, të cilat kanë stagnuar ashtu siç kanë qenë, duke e bërë të pamundshëm përballimin e kostos së jetesës. Është për të ardhur keq se si në këtë kohë pa rritje rrogash, me çmime të larta dhe me gjithë këtë pasuri nëntokësore që e kemi, të bëhet një rritje e tillë, që ndikon drejtpërdrejt në përkeqësimin e kushteve ekonomike të shërbimit civil”, tha Gashi.

Ai kritikoi Qeverinë për injorim të shërbyesve civilë dhe për mungesë të vullnetit për të adresuar problemet e tyre. Sipas tij, ekzekutivi ka synuar të heshtë sindikatat dhe të kufizojë të drejtat e tyre.

“Në përgjithësi, te zyrtarët publikë kjo qeveri në njëfarë forme i ka injoruar dhe them të drejtën ka pasur tendenca që edhe t’i kapë, t’ua ndalojë zërin dhe t’i shantazhojë në njëfarë forme, duke tentuar kohë pas kohe t’i privojë nga disa të drejta. Ne vazhdimisht kemi luftuar që të kemi një marrëveshje kolektive. Edhe pse është punuar vite të tëra, ajo po qëndron në sirtarët e qeverisë. Kjo qeveri, edhe pse e ka obligim kushtetues dhe ligjor, nuk e ka themeluar Këshillin Ekonomiko-Social, ku sindikata e përcjellë zërin e anëtarësisë. Kjo qeveri nuk ka interes, çdo ditë e më shumë mer vendime dhe rrit çmime, si kjo e fundit e energjisë, e cila e vështirëson situatën dhe besoni që zyrtarët publikë janë sektori më i prekur, duke marrë parasysh që ata varen nga një pagë shtetërore, e cila ka mbetur në vend”, tha ai.

Një ndër shqetësimet kryesore të sindikatës mbetet edhe mospagesa e orëve shtesë për disa kategori të shërbimit publik, përfshirë zjarrfikësit, të cilët, sipas Gashit, trajtohen si “heronj vetëm sa për sy e faqe”.

“Kohët e fundit nuk është bërë pagesa e orëve shtesë as për disa sektorë të sigurisë. Në kuadrin tonë janë zjarrfikësit dhe them të drejtën për ne kjo është e papranueshme. Zjarrfikësit, kur kemi situata emergjente, dimë t’i quajmë heronj sa për sy e faqe, por më pas i injorojmë, nuk i përfillim. Paramendoni, për punën e tyre, të cilën e kanë bërë natë e ditë, duke rrezikuar edhe jetën e vet për të shpëtuar pasurinë dhe familjet tona, atyre nuk u paguhen orët shtesë. Nuk u paguhen dhe nuk u është rregulluar çështja e rrezikshmërisë. Kjo rritje e çmimeve të produkteve bazike dhe e energjisë elektrike rëndon shumë kushtet dhe gjendjen ekonomike të zyrtarëve publikë”, tha ai. /Ekonomia Online/