Tarifa e Trumpit për Kosovën, shkas i ri i përplasjes së presidentes dhe qeverisë në detyrë

Vendimi i presidentit të Shteteve të Bashkuara të Amerikës , Donald Trump, për tarifë bazë 10 për qind për importet nga të gjitha vendet e botës, përfshirë edhe ato nga Kosova, ishte shkas i një përplasjeje të re midis presidentes Vjosa Osmani dhe qeverisë në detyrë. Gjuha e përdorur në këtë komunikim tregoi qartësisht se nevojitet vetëm një shkëndijë që të dalin në pah marrëdhëniet e tyre të vërteta, raporton Ekonomia Online.

Kërkesa e presidentes Osmani që Kosova t’ia heq tarifën ShBA-ve ngjalli reagimin e ministrit në detyrë të Financave Hekuran Muratit dhe më pas edhe kundërreagimin e këshilltarit të presidentes Bekim Kupina.

“Sot, zyrtarisht i kërkova Qeverisë së Kosovës që të pezullojë tarifat e importit për të gjitha produktet amerikane – një hap i rëndësishëm për të thelluar lidhjet ekonomike me aleatin tonë më të ngushtë dhe për të dërguar një mesazh të qartë: Kosova është e gatshme për një marrëdhënie më të fuqishme me Shtetet e Bashkuara, me një vizion të qartë që do t’i bënte të dyja vendet tona më të forta, më të sigurta dhe më të begata.”, ishte kërkesa e presidentes Osmani.

Sakaq, reagoi ministri në detyrë, Hekuran Murati, jo pa një dozë ironie në komunikim.

“Kërkesa në email ishte dërguar në adresë të Qeverisë në 17:39, ndërkaq kjo gjë ishte bërë publike në rrjetin social X në 17:42, veç 3 minuta më vonë. Shfrytëzoj rastin përmes këtij postimi që të njoftoj Presidenten, por edhe qytetarët, që si kabinet qeveritar ne veçse kemi qenë duke e shqyrtuar këtë temë. Dhe kurdo që merret një vendim patjetër që do t’ju njoftojmë me kohë.”, ishte reagimi i Muratit.

I rreptë ndaj tij ishte kundërreagimi i këshilltarit për media të Presidentes Osmani, Bekim Kupina,. Ai tha se Murati është njeriu i fundit që mund të flas për seriozitet.

“Një njeri që ende nuk e ka kuptuar që udhëheqja e shtetit është punë 24/7, e jo që përfundon në orën 16:00, një njeri që ende nuk e kupton që sipas Kushtetutës dhe komentarit të Kushtetutës, objektivat e politikës së jashtme i përcakton institucioni i Presidencës, që nuk e kupton që këto gjëra nuk janë thjesht veprime ekonomike, por veprime strategjike”, tha Kupina, duke rikujtuar se presidentja udhëheq politikën e jashtme.