Këshilli i Sigurisë Kombëtare mban sot mbledhje
Këshilli i Sigurisë Kombëtare do të mbajë sot mbledhje në orën 19:00. Në mbledhjen e Këshillit të Sigurisë Kombëtare do të diskutohet për situatën e sigurisë në vend, ndërsa mbajtjen e mbledhjes e ka konfirmuar për Telegrafin Presidenca e Kosovës. Telegrafi merr vesh se takimi mbahet në orën 19:00. Ndryshe, kriza në Ukrainë ka ngritur shqetësime edhe për sigurinë në rajon. Në Ukrainë sot është shpallur gjendja e jashtëzakonshme, Ky shtet u u ka thënë qytetarëve të saj që të mos vizitojnë Rusinë dhe paralajmëroi çdo ukrainas që ndodhet atje të largohet menjëherë. Agresionin e Rusisë ndaj dy krahinave në lindje të Ukrainës e kanë dënuar krerët e institucioneve të Kosovës. Ndërsa, SHBA, BE dhe vende të tjera kanë paralajmëruar sanksione të ashpra ndaj Rusisë. Lidhur me situatën në Ukrainë dhe vizitën e paralajmëruar të shefit të Shërbimeve të sigurisë së Rusisë, Nikolai Patrushev në Beograd për Telegrafin kanë folur edhe nga Presidenca e Kosovës. Bekim Kupina, këshilltar për media i presidentes Vjosa Osmani, tha për Telegrafin se tendencat e Rusisë për destabilizim të rajonit, duke e përdorur Serbinë si aleate, janë të kamotshme. “Kriza në Ukrainë, padyshim se mund të ketë ndikim edhe në Ballkanin Perëndimor. Tendencat e Rusisë për destabilizim të rajonit, duke e përdorur Serbinë si aleate, janë të kamotshme. Serbia dhe Rusia kanë bashkëpunim politiko-ushtarak, i cili është në shërbim të synimeve hegjemoniste të tyre dhe paraqet rrezik për paqen dhe stabilitetin e rajonit”, tha ai.Sipas tij, bota demokratike duhet me vendosmëri t’i përgjigjet Putinit dhe satelitëve të tij sepse me veprimet prej agresori, Rusia nuk e kërcënon vetëm atë rajon, sfida bie mbi gjithë Evropën, ndaj duhet unitet dhe vendosmëri kundrejt tendencave të Rusisë dhe Serbisë. “Kosova mbështet Ukrainën dhe është kundër agresionit të Rusisë”, u shpreh Kupina. Sipas tij, kjo vizitë dhe deklaratat e Vuqiçit dëshmojnë së Rusia dhe Serbia target të ardhshëm e kanë destabilizimin e Ballkanit Perëndimor.
