Fryma poetike e së dielës me poetin ;-Gëzim AJGERAJ

NJË FYELL NDËR MALE

———————————–

Jehona e një melodie fyelli

shponte male e fusha

qysh me agun e par të mëngjesit

kur dielli zgjaste kokën tek kodra mbi Vërri

e notat e tij

hynin shtëpi për shtëpi atje tek lagjja

dhe trazonin shpirtin e një vashe

që krihej çdo mëngjes

aty tek dritarja

jehonës së tij

i shtoheshin edhe ca kambana delesh

që kullotnin blerimin e lëndinave

dhe kullotave

përtej shpati

dhe thirrja e çobanit

herë pas here

atë verë edhe bilbilat

e ndalën këngën

përpara jehonës së fyellit

dhe tingujt e valleve të bukura

që pushtonin

shpirtin e malësorëve

dhe drenushës flokëkuqe

atje tek dritarja

në verën tjetër s`u dëgjua

as fyelli

e as flokëkuqja

nuk u pa më tek dritarja

as delet mbi shpati përtej

thonë se vjeshta

i gjeti nën një kurorë

2002

/www.qendrapress.com/