Çaste poetike me poeten;-Shyrete DEMAJ

Nanë e kishte emrin.

————————–

Nana shpërndante nga një riskë bukë,

i hidhe pak sheqer përmbi,

buka zbardhej si me borë.

Na ëmbëlsonte si loja e fëmijëve

me topa bore.

Bukën e kishim me racion

por nëna kishte shpirt pa racion

për të gjithë fëmijët e fshatit…

E thërrisnin Nana Dude.

Vraponim në lojë pa brenga,

e nana gatuante për netët e shenjta.

Për ditën e verës

gjithë dashurinë e bënte aromë,

e hidhte mbi sofrën ku shtrohej darka.

Ajo kishte ditëlindjen,

e rilindte çdo ditë vere me gëzimin tonë

kur trupi i saj shkrihej në mundim.

Brengat përtypte nëna ndaj ish e ngopur.

-Hani ju fëmijë, nëna nuk kam uri.

Tinguj lugësh të gëzuara ishin

koncert lumturie i çdo dite vere.

Fjalë të ngrohta nëne

ishin ëmbëlsira që sgjendeshin askund…

/QendraPress/