Fryma poetike e së mërkurës me poeten;Zyba HYSA
VENDLINDJE…
—————————
Kokrevë, mall i ndezur në shpirt,
Djeg mall i vjetër, si mall i ri!
Thinja mallit s’i dalin, o dritë,
E pse e thinjur vij sot tek Ti!!
Aty ndjej ëmbël zërin e nënës,
Si kënga e zogjve në zabel,
Më qetësonte rrahjet e zemrës,
I vetmi zë, i pashuar ka ngel!
Aty ndjej përqafimin e babës,
I ngrohtë si flladi që puth lulet,
E unë si lule çilja nën Diell,
Malli i tij, një mall që s’shuhet!
Aty, Kokrevë kam strehuar lodrat,
Sikur në klasë jepja mësim,
Të qeshurat e fëmijërisë pa shkak,
S’kërkon shkak, lumturia në vendin tim!
Aty, kam fshehur ëndrrat rinore,
S’ishin si çdo vajzë për princin e saj,
Veten e shihja në bankat shkollore,
Të vetmen ëndërr që gjallë mbaj!
Aty kam ngazëllimin e diellit,
Kur nxirrte syrin mbi Shebenik,
Eh, ç’ngazëllim i ka dhenë shpirtit,
Sikur të më vinte më i miri mik!
Aty kam lënë këngët e Shkumbinit,
Simfonia më e bukur e kënduar!
Me to shënoja plagët e lëndimit,
Nga faj i pafaj kur qesh dashuruar!
Aty kam çdo gjë që ëndërrova,
Çdo gjë që doja të bëja në jetë,
Në brazdat e tua i shkrova,
Si libër vij, të shfletoj çdo fletë!
Erdha, e dashur vendlindje,
Si erë e marrë, si shkul lumi,
Tek Ti e dashur pësoj rilindje,
Vij prehem, por s’më merr gjumi!
/ZYBA HYSA/
TIRANË, MË 14 PRILL
/QendraPress/
