Çaste poetike me poeten:-Xhuli SPAHIU

Gjysma e Shpirtit në Gurbet

————————————–

U ktheva për Kosovë,

me valixhen plot rrugë

dhe zemrën të ndarë në dy horizonte.

Njëra anë udhëton me mua,

mbi krahët e kujtimeve,

drejt tokës që më pret me zemër

dhe më thërret me emër.

Tjetra mbetet larg, në gurbet,

aty ku qeshin fëmijët,

ku rriten nipat e mbesat,

si degë të reja të pemës sime.

Në sytë e tyre lashë stinët e mia,

në përqafimet e tyre

copëza drite nga vitet që kaluan.

Rruga më kthen në vendlindje,

por jo të tërin.

Gjysma e shpirtit mbetet atje,

mes zërave që më thërrasin gjyshe,

mes duarve të vogla që valëvitin lamtumirën.

Kështu jeton mërgimtari:

me një këmbë në atdhe,

me tjetrën në mall,

duke ndërtuar ura të padukshme

mes dy botëve që i do njësoj.

Sot nisem për Kosovë,

por zemra ime e di mirë:

nuk ka udhëtim që më largon

nga ata që i mbaj brenda vetes,

në thellësi të shpirtit tim.

/QendraPress/