Çaste poetike me poetin;-Gazmend BEQAJ

Familja ime

———————————–

Duke gropuar veten

në kërkim të rrënjëve

që rriten gjithë këto degë

me vargjet e mia

nisa t’i ledhatoj mallshëm

kujtimet e buzëqeshura

zhgënjimet e jetës

të gjitha pengesat e kohës

të kthyera në shkallë

që më ringriten

e më mbajtën gjallë

Duke gropuar veten

krejt të pajetuarat e jetës

që borxh ia pata vetes

nis të ngrejnë krye

e t’më kërkojnë shpagim

frymën ma zënë

trupin ma rrënqethin

e në mua zgjojnë dyshim

për bekimin e gjurmëve të mirësisë

që udhëve të jetës

pas vetes kam lënë…

Duke gropuar veten

nga një kodër jo larg ëndrrës

vetes i thashë

s’duhet të jam i zhgënjyer

e të ndihem bosh

sa herë përqaf fëmijët e mi e ndiej

gjithë madhështinë e jetës

të më rrjedhë ndër dej

se është familja e shëndosh

është familja ime

satisfakcioni më i madh i jetës sime

/QendraPress/