Çaste me poeten :Manushaqe Hoxha Laçi

Dashuria ka emrin tënd

——————————-

Flokët mbi supe si ujvarë

dehur nga vesë e mëngjesit.

Baluket hedhur mbi ballë

sytë e mi me mall ti krehin.

Kur mbi taka e hedh hapin

me nxitim në trotuar.

Zemra seç e merr vrapin

sytë e qeshur për të parë.

Fustanet çdo ditë ndërron

ngjyra- ngjyra e lule shumë.

Shpirtin mua ma ngacmon

ndjenjat për ty rrjedhin si lumë.

Kur pranë meje ti kalon

dhe parfumin tënd e ndjej.

Në damarë gjaku më vlon

në sy më lindin mijëra diej.

Kohë e gjatë që të mendoj

je princesha që kam në zemër.

Ditënetëve për ty ëndërroj

dashuria ka vetëm një emër.

Emrin tënd dashuria mban

në sytë e mi mund ta lexosh.

Gjithë jetën të dua pranë

prekma zemrën të besosh.