Tre persona vdesin në rrethana të dyshimta për 24 orë, dy në Prishtinë e një në Drenas

Brenda 24 orësh në territorin e Kosovës janë raportuar tri raste të vdekjeve të dyshimta.

Policia e Kosovës me anë të raportit 24 orësh ka bërë të ditur se dy nga këto raste kanë ndodhur në Prishtinë.

Njëra vdekje e dyshimtë është shënuar në rrugën “Xhavit Ahmeti” në Prishtinë, ku raportohet se në banesën e tij është gjetur pa shenja jete viktima i gjinisë mashkullore.

Në vendin e ngjarjes kanë dalë njësitë relevante dhe trupin e pajetë e ka tërhequr njësia e mjekësisë ligjore.

Tjetri rast ka ndodhur në rrugën “Skender Matallari”. Aty raportohet se në rrugë është gjetur pa shenja jete viktima mashkull kosovar. Viktima në këtë rast ishte një 20-vjeçar.

Me vendim të prokurorit, trupi i pajetë është dërguar në IML për obduksion.

Rasti i tretë ka ndodhur në Komoran të Drenasit, ku raportohet se në shtëpinë e tij është gjetur pa shenja jete viktima mashkull kosovar.

Në objektin përcjellës të shtëpisë së viktimës, janë gjetur dhe janë konfiskuar armë zjarri AK-47, katër karikatorë me nga 30 fishekë, tre detonatorë elektrikë, shtatë granata dore, si dhe një sasi e municionit të ndryshëm.

Trupi i pajetë i viktimës është dërguar në IML për obduksion.