A mund të ketë bashkëqeverisje PDK-VV, Berisha: Asgjë nuk na bashkon me VV-në

Deputeti i PDK-së, Hisen Berisha, ka kritikuar ashpër kryeministrin Albin Kurti, duke e akuzuar për manipulim të shifrave në qeverisje.

Berisha po ashtu mohoi çdo mundësi bashkëpunimi me Lëvizjen Vetëvendosje, duke theksuar se PDK dhe VV kanë dallime të thella në programet qeverisëse.

Ai përjashtoi kategorikisht mbështetjen e tij për Kurtin si kryeministër, duke shtuar se PDK-ja është një parti shtetformuese pa vija të kuqe me asnjë subjekt politik.

“PDK dhe VV-në i ndan backgraund-i. Le të mundohen sa të donë, nëse iu dy qeverisni bashkë bëhet marrëveshje finale ratifikohet kufiri, na njeh pavarësinë Serbia, ndoshta edhe pranojnë me hy bashkë, nuk dihet me kë. Në aspektin programor qeverisës edhe filozofisë që prezantojmë si dy subjekte. Asgjë nuk na bashkon me VV-në. Unë mendoj se PDK-ja nuk ka vija të kuqe me asnjë parti, sepse është parti shtetforumese. Kurrë me votën time s’e bëj kryeministër Kurtin”, ka deklaruar ai, në “Debat Plus” të RTV Dukagjini.

Berisha, duke komentuar gabimin e kryeministrit Albin Kurti në zgjidhjen e ekuacionit sot në një shkollë të Podujevës, ka thënë se kështu ai manipulon popullin me rezultatet e qeverisjes së tij që i shumëfishon.

Sipas tij, gabimi i Kurtit në matematikë nuk është rezultat i paditurisë, por një “sëmundje profesionale” që reflekton tendencën e tij për të prezantuar shifra më të larta se realiteti.

“Nuk duhet të befasohen nxënësit e as qytetarët që e ka bërë X-në në vlerën 5 e ka shumëfishuar e jo zero, sepse edhe rezultatet e qeverisë që janë krejt zero ky i ka shumëfishuar. Kjo është pjesë e propagandës së tij, për të mbuluar dështimin total e falimentimin total në këtë qeverisje”, ka deklaruar ai. /Dukagjini/