Çaste poetike me poeten: Lebibe ZOGIANI
DO TË LUAJA FSHEHURAZI ME KOHËN
——————————————————–
Eh
Sikur të ecja me pritjen tënde
jeta ime do të ishte vetëm
një hap.
Me dhembjen për kohën pa ty
do t’i ndalja akrepat kohës,
do ta lija botën pa kohë!
Eh
Sikur të mos ecja me ikjen tënde
do t’i fshija hapat e kohës.
Do të kthehesha në lindjen e botës,
dhe do të lindja vetëm për ty!
Eh
Sikur të ecja me ëndrrën me ty
do ta gjeja edhe Zotin ku fshihet.
Do ta bëja kohën ëndërr,
do ta lija botën pa sy!
Eh
Po të ecja udhës së shkronjave
për ta kërkuar emrin tënd,
koha do të ishte
vetëm pesë shkronja
bota do të mbetej pa libra,
pa emër!
Eh
Sikur të ecja me këngën për ty
kohën do ta bëja këngë
me valsin e mallit,
Zotin do ta zbrisja në tokë
e bota s’do të qante më kurrë!
/www.QendraPress.com/
