Çaste poetike me poeten:Donika Stasa DOMI

KUR IKËN NËNA….

——————————-

Kur ikën Nëna…

me terr vishet gjithësia ,

dhe dielli trishtueshëm

struket në një qosh ,

grimca rrezesh

si copëza dritash të përthyera ,

kërkojnë të depërtojnë

tej murit të zemrës ,

por s’munden të të ngrohin

kraharorin si zgavër bosh .

Kur ikën Nëna…

harkohen dhimbjesh

trarët e shtëpisë ,

e pragu pikon

lotë të gurtë ,

rrugica hesht

në pritje hapash perëndeshe ,

të ndiej përmallshëm

aromën e saj të parfumtë .

Kur ikën Nëna…

hidhërimi hedh rrënjë

mpleksur ndër damarë ,

e ethet e shpirtit

askund nuk kanë cak ,

ti shpresëthyer…

dëshpërimisht e kërkon

hapësirash qiellore ,

dashurinë të ta hedh si balsam

mbi trupin e mbushur plagë .

/www.QendraPress.com/