Çaste poetike me poeten;Gerta BANDILLI
Filozofia e së mërkurës
———————————
Më gënjyen kur më thanë
që fluturat shtegtojnë kur vjen dimri.
Kur i pyeta ku,
më thanë në pyje.
– Po pyjet janë larg!
– Ti e sheh mbi lule
nuk rrinë, se lulet u thanë.
– Po, prapë pyjet janë larg!
– Epo erërat i marrin me vete
se të lehta janë,
nuk e sheh sa të brishta krahët i kanë.
– Po era u shkatërron krahët…
– I mbron vjeshta, – më thanë.
– Vjeshta është e brishtë për vete!
– U rriten përsëri mos ki hall.
Besova kur më thanë që flutura
shkojnë në pyje
prekin pemët, barin
e ndonjë livadh,
prandaj pyjet bëhen të verdhë
të bardhë, të grinjtë
dhe kur i prek
të lënë një shenjë të përhimtë.
Që atëherë me dëshirën
edhe më të madhe se të Kësulëkuqes
kërkoj ku janë fshehur
duke gënjyer veten
se flutura në dimër
shkojnë në pyll…
/www.QendraPress.com/
