Çaste poetike me poetin;-Mevlan LUSHI

NË STAMBOLL KUR SHKOVA

Në Stamboll kur shkova

Me shokë për herë të parë

Se gjyshi atje kish mbetur

Nga mendja s’më qe ndarë.

Ngado që shkuam e pamë

Në kryeqytet të dovletit

Në mendjen time bluaja

Kohën e shkuar të kurbetit.

Kamarierët në lokale

Arnaut na thirrnin

Na ftonin për t’zënë vend

Shpejt kafenë na sillnin

Në rrugët plot histori

Të Stambollit të vjetër

Ndoshta gjyshi kish ecur

Larg në një kohë tjetër.

Në breg të Marmarasë

Tek rrija e vështroja

Zhytur në mendime

Gjyshin përftyroja.

Në kurbet kish qëndruar

Shumë vite pa ardhë

N’Stamboll kish ndrru jetë

Fëmijtë e tij pa i parë.

Në këtë qytet magjepës

Me njerëz nga çdo anë

Shumë njerëz si gjyshi im

Aty jetën kishin lënë.

/QendraPress/