Çaste poetike me  poetin;-Sami MULAJ

MË GJENI ATDHEUN ?!

——————————–

E kërkova në shpatin e vjetave,

as rrugë gjurma nuk është ma,…

E shkunda një çetinak si dikur të gjej

aty ndonjë çerdhe zogu gushkuq,

gjeta aty vetëm disa grepa viçi të ndryshkur

e një bisht furke të thyer,

plakat as çikat e reja

nuk shkelin ma aty,

nuk tjerrin ma për pajë.

E kërkova në oborrin e shkollës ku nisa klasën e parë,…

ferra e hithra ishte mbush,

shkela mbi një zile,

e gërryer ishte si një brinjë dinosauri e lashtë.

E kërkova tek pusi

ku laheshim dikur në lumë,

as nuk kishte ujë,

as nuk kishte zallë,

një digë përmbi si kulshedra

pusin e rinisë time e kishte përpi,

e kishte tha.

E kërkova në bregun e detit,

aty ku ujët e kripur piva pa dashur herën e parë…

Më thanë mos u afro…

është hotel restorant i një pushtetari,

aty nuk është plazh ma.

E lyp, e lyp…

mbeta lypsarë.

Më falni pak Atdhe,

ju lutem!

Në se diku e keni parë.

/QendraPress/