Çmimet e rrymës në Evropë në nivele të frikshme, Shqipëria po e ndihmon Kosovën 

                         Një megavat orë energji elektrike kushton 625 euro, ndërsa në pikun e kërkesës çmimi kalon vlerën 700 euro.E ndodhur në këto kushte Shqipëria po prodhon përmes Kaskadës së Drinit të gjithë energjinë që përdoret për konsum.Niveli në liqenin e Fierzës ka rënë në 275 metra, 10 metra poshtë mesatares shumëvjeçare të kësaj periudhe, ndërsa me prodhimin vendas po ndihmohet dhe Kosova, shkruan euronews.alKomani dhe Vau i Dejës ndodhen në nivelin 174 dhe 73 metra, por prurjet në të gjithë hidrocentralet janë minimale.Korporata Elektroenergjitike ka hapur disa tenderë për blerjen e energjisë elektrike, të cilat i ka anuluar për shkak të çmimeve të larta që kanë ofruar pjesëmarrësit.

KESH kërkon që të kontraktojë një sasi prej 20 mijë megavat orë për të siguruar energji në ditët e fundjavës, procedurë e cila nëse finalizohet pritet t’i kushtojë vendit një faturë shpenzimi ditor prej 6 milion eurosh në ditë.

Prodhimi i energjisë është ulur në të gjithë kontinentin europian për shkak të thatësirës e cila ka reduktuar jo vetëm prodhimin nga uji, por është ulur edhe shpejtësia e impianteve të erës, ndërsa impiantet nuklearë në Francë janë stakuar pasi nuk ka sasi të mjaftueshme uji për ftohjen e tyre.

Javët e fundit qeveria shqiptare ka nisur një fushatë për kursimin e energjisë elektrike, ndërsa po përgatitet për t’i kërkuar Entit Rregullator të Energjisë ndarjen në fasha të faturës së energjisë dhe rritjes së çmimit për konsumin mbi 800 kilovat orë në muaj