E diela me penën e artë të shkrimtarit:Gëzim Ajgeraj

HARRESA

————————-

Sikur harruam

Se e djeshmja e jonë

Nëpër errësirën verbuese

E me tehun e shpatës në fyt

Na i thirrte plotë mallkim

Zhbërjes tonë

memories shpejtë

po ia ndërrojmë pllakat

duke shkelur me dy këmbë

të shkuarën tonë

e solidariteti

me djajtë e djallëzisë

na i verbon ditët tona të bardha

jemi bërë hije korb

dritës sonë

dhe pak ngapakë

sikur ia gërryejmë

lëkurën e atdheut

dhe diellin e bardhë

që me aq mund e zbritëm

mbi kokat tona

me gurin e lakmisë

së tepruar

po ia thyejmë

kokat vetes

e jo satanës së veriut

që ende po na e pinë gjakun

nga përtej gardhi

2021

MOSHA

———————

Me dy duar të lidhura pas shpine

ikim moshës drejt harrimit

Dekadave që na ndoqën si hije

Mbollëm gjurmët

Të mira apo të liga

Se si na dirigjoi vetvetja

Varësisht si i përplasëm apo

Nëpër ecjen tonë mbi gurë a baltë

gjurmëve të përplasjes së ligë

Ua lamë njollat e stërkalave

apo me puplat e lehta

Mbollëm krenarinë e kujtimit

Dhe tanimë që jemi afruar

Udhëve të harrimit

Moshës na i duhet rezymeja e kujtimit

Nëse ecëm mbarë e mirë

Të paktën t’ia lëmë

Një të mirë kujtimit

PASAPORTA

——————————-

Më shkruan

e ç’nuk më shkruan

mbi emër e mbiemër

Herë avnojan më thanë

herë unmikistan, e e e…!

Tri herë ma ndërruan

të mallkuarën

Të kuqe, të kaltër…

e asnjëra s’më bënte

as për atje poshtë (me nder me thanë!)

letra ishte e fort

Më thanë

edhe sa të duash të japim

e ç’të duash

vetëm atë mos e kërko

se ia prishim

qefin Evropës (të më falni…)

Shqiponja më mbeti qiellit

assesi s’e zbrita në xhepin tim