E diela me poetin:Syhejl HAVOLLI
MBRËMJE DIMRI NË QYTETIN TIM
————————————————
Herë mengadale
Dhe herë me rrëmbim
Bora si një veshtull
Mbështjell qytetin tim
Në rrugën e lagjes
Në shpatin përbri
Rrëshqasin buzëqeshjet
Me saja e me ski
Dhe në udhëkryqet
Që kanë dritë të verdhë
Një dorë e madhe shumë
Borën dyllë e derdh…
Këto tufa bore:
Të bardha, kuq e të verdha
Përdridhen si fluturat
Që i sjell pranvera…
Flokët e çupëzës
Me fjolla stolisur
Ngjajnë me një punëdore
Për merak qëndisur…
26.12.2020
PREJ MALLIT TË MADH
SI YJE U SHIKUAN
——————————-
Hapma derën
Kush je o burrë
Që thellë më vështron
Më thuaj çfarë të mundon
Nuk jam lugat
Të ta ha zemrën
Jam Engjëlli
I shpirtit tënd
I buzëve tua shkrumb
Në këto orë të vona
Nata është e qetë
Ti nuk je Engjëlli im
Tash e sa vjet
Jam e harruar
Jam e vetmuar
Prej mallit të madh
Si yje u shikuan
4 janar 2021
MOS TROKIT NË DRITARE
———————————–
Po pse moj
Muzë
Kaq shpejt
Më paske harruar
Kur ti fort mirë e di
Që zemrën ta kam sunduar
Nëse vjen
Mos trokit në dritare
Tashmë të mjegulluar
Do t’i shohësh dy zemra
Mbi krahët e këngës sime
Plot mall e dashuri
Ti erdhe sa mrekulli
Ma bëre shpirtin më të ri.
9 janar 2021