E diela poetike me poetin;-Faruk TASHOLLI
MARSHI I ADEM GLLAVICËS
————————————————-
Ai ka ikur moti e prapë zbret aty
Te gurët e ashpër të vendlindjes sime,
Me flakët e shkrepura kur qielli u nxi
Si flamur valohet e çel ndër kujtime.
Pa bërë një as dy niset para: Marsh!
Tek e kërcen fushën nga mali në mal;
Ndër bubullima kurrë s‘kthen kokën pas
Ç’zë i vjen prej tokës: Hapin mos e ndal!
Del nga legjendat me hapat plot magji
A bjeshkët e Zhegofcit i qet Mitrovicës,
Kush e prek nga afër kush e ndjen në gji
Marshin e furishëm të Adem Gllavicës?
Ai e tremb muzgun nga maja e kodrës
E gris yllin e kuq, ia pren udhët kobit,
Engjull mbrojtës shfaqet qiellit të Kosovës
Ballë i tij i ndritur, Ballë i lartë i Kombit!
www.qendrapress.com
