E premtja poetike me poeten; Natasha XhELILI

VAJZA E DËBORËS

———————————-

Me flokë dëbore

t’i spërkita qerpikët

fjalët,

ëndrrat.

Të vura diej në sy.

Prej hapësirës

ngrohtësinë e rrëmbeva;

kurmi yt i bardhë

në vallëzim më ftoi.

Atje, në mes të Sheshit

me valsin (valëvitjen) e erës

që ngarendte për ta mbajtur fustanin

si të një dame

U ngurosa para teje

Beli yt dridhej në prekjen e bardhë të dorës sime

Ritmi më mban në drejtqëndrim

Nata e qelqtë buzët e tua m’i zgjat.

Ato përflaken ende pa i prekur

Vishem me bardhësinë e qytetit

Nën vështrimin e mijëra yjeve

që më grishin në festën e madhe

Magjistarët e kohërave i thërras,

të gjithë,

bëj fli dhe jetën time

të vesh bukurinë e Helenës

e guximin e Athinasë

dhe vendos në sfond muzikën e shpirtit tim

Belholla ime

hapin tënd pres.

 /www.qendrapress.com/