Ekspertët ndërkombëtarë: Kurti do të vihet në presion për dialogun

Eksperti i marrëdhënieve ndërkombëtare, Richard Caplan, thotë se fituesi i zgjedhjeve të 14 shkurtit, Albin Kurti, do të vihet në presion që të rikthehet në tavolinën e negociatave me Serbinë, njofton Insajderi.“Është një fitore shumë më e madhe se e zgjedhjeve të kaluara. Prioriteti kryesor i Kurtit duket se nuk do të jetë dialogu, por kujtojmë se Biden gjatë një telefonate me Vuçiqin foli me të për rëndësinë që ka dialogu dhe njohja reciproke. Edhe Kurti do të vihet në presion që të rikthehet në tavolinën e negociatave. Unë mund të them se kjo status quo nuk është e mirë për asnjërën palë”, deklaroi për RTV Dukagjinin, Richard Caplan.Ndërsa hulumuesi britanik, Aidan Hehir, thotë se qytetarët në Kosovë votuan për ndryshime rrënjësore.“Kosova ka pasur shumë nevojë për një ndryshim të tillë. Njerëzit janë lodhur nga kasta e vjetër politike dhe mënyra se si kanë shkuar punës. Papunësia dhe mungesa e perspektivës ka detyruar qytetarët që të kërkojnë ndryshime rrënjësore. Qeveria duhet t’ua kthejë besimin qytetarëve. Unë kuptoj se shumë njerëz duan që kjo qeveri të dështojë sepse preferonin që Kosova të udhëhiqej nga kasta e vjetër politike e PDK-së dhe LDK-së”.Hehir thotë se fitorja e Kurtit dhe Osmanit është një mesazh edhe për Bashkimin Evropian.“Situata me dialogun tashmë ka ndryshuar. Trump dhe Grenell nuk janë më. Administrata e Biden është e prirur të jetë më konstruktive në raport me dialogun. Bashkimi Evropian e ka kuptuar se dialogu mes Prishtinës dhe Beogradit ka dështuar tashmë dhe se diçka në këtë drejtim duhet të ndryshojë. Kjo fitore e thellë e Kurtit dhe Osmanit është një mesazh se mënyra e vjetër e të bërit politikë ka përfunduar tashmë”, ka përfunduar ai