Fryma poetike e së dielës me poeten;Imer HYSA

IKIN VITET

——————-

-në përvjetorin tim të lindjes-

Nëse vitet që kalova do i thirrja në rresht

Shumica prej tyre më binden

Edhe ata me të cilët s’u mora vesht

As ata nga frika nuk më fshihen.

Pata vite të arta, të qeta, të lumtura

Mes dashurisë veten ndjeja mbret

Siç pata vite pothuajse të humbura

Të tjerë, që jo rrallë më vunē nē siklet.

Shumicës së viteve u bëra rreshtore

Vetë i drejtova si desha, majtas, djathtas

Siç pata vite si zhgarravina në fletore

Që të revoltuar më dilnin haptas.

Pata vite të lulëzuara si pemët në prill

Siç pata shumë vite plot fruta vjeshte

Pata vite që ngelën memecë për çudi

Që su dhashë frymë, i lashë në heshtje.

Kalova vite pse jo, të acarta

Jo nga moti, nga njerëz pa zemër

Që s’ma linin vrapin, suleshin me të katra

Në mos kokën, të më thyenin këmbën.

Ikin vitet, nuk u’a marr merak

Vetë i jetova, qetë dhe çmendurisht

Ndjesë për vitet që u hyra në hak

Respekt për vitet që kalova lumturisht.

.

. .

Vitet e mija ngjajnë me pemët

Shumica krijuan bazën te rrënjët,

Të tjerë me lodhje e mund

U lartësuan krenarë në trung.

Ca duke menduar për vete

U hapën në formën e degëve,

Të tjerë me prirje për qejfe

Shkëlqyen e ranë si gjethe.

Pata dhe vite të tjerë që s’u dogjën

Por si fruta ngadalë u poqën

Një gjë se di, do kuptoj ndonjëherë

Ishin fruta te ëmbla a të hidhura zeher.,

./www.QendraPress.com/