Fryma poetike e së dielës me poetin;Gëzim AJGERAJ

Vajtuese

—————————-

Kur të heshtin kullat pragjet kur të mallkojnë

Kur portën e avllisë të kenë pushtuar

armatë e merimangave

Kur bari të jetë rritur s’ ka kush t’ i vërë kosë oborrit

Kur kumbulla të lulëzojë e kokrrat të jenë shtruar

në vjeshtë

Kur vreshta të mos kokojë as kokërr rrushi për ilaç

Kur arën ta kenë mbuluar ferrat

Kur as nam e nishan emrit të mos i ketë mbetur

Kur gurët e cokaqeve në lagje hapat t’ i kenë harruar

Kur këngës ndër male as jehonë të mos i ketë

mbetur luginave

Kur nëna të ketë ikur amshimit kush t’ i vajtojë udhët tua

Kur as zogjtë e pranverave të reja as flokun s’ ta njohin

Kur emrit tendë as nam e nishan mos t’ i gjendet

Kur as emrin mbi gurë s’ ka kush të ta shkruajë

Vaj halli për ne e për udhët tona!

/www.QendraPress.com/