Çaste poetike me poeten;- Vjollca ALIAJ

Flamingot në fluturim

————————————–

Peizazh me pendë të dallgëta rozë,

Flamingot e morën fluturimin,

Këto ujëra, pasqyrime engjëjsh,

Seç pëshpëritin mallëngjimin.

Ç’torturë kraharori bosh,

Ky shpirt i bashkohet tufës,

Klithmë e spirales, si vetëtimë dielli,

Tingëllin mbrëmjet e vetmuara.

Flamingot e morën fluturimin,

Mbështjellë me korrin e lagunave,

O ju, skelete zemrash prej kripe,

këndoni puthjen e harruar të Adamit!

Rënkime të ëmbla, pa mëkate,

Një pupël rozë, e kotë çdo fjalë,

I lë ofshamat t’i shkojnë pas flamingos,

Fshehur në terrin e të pamundurës.

Mbi këto ujëra, pasqyrime qiejsh,

Ninullat ndjekin ritmin e zjarrit,

E nëse vdesin me perëndimet,

Nga fluturimet do të ringjallen.

/QendraPress.com/