Fryma poetike e së dielës me poetin:Hazir LUTA

JETËVDEKJA

——————————

Koha m’i gërryen rrugët

Si ujë vërshimesh në Pranverë

Kur bora e shpirtit shkrihet

Dhe zbraz krejt mllefin

Mbi kalanë e quajtur jetë

Kalanë jetë

Që as lumturia s’e pushton

As edhe kur shpirti dhemb

Veç vdekja

Vdekja e shemb

Koha e përdalë dalldiset

Në kurrizin tim të fortë

Të kalitur prej kohësh

Mes përmes dhimbjesh

Në guacën e zbrazët të lumturisë

Dhe unë buzë vdekjes

Mbledh guralecët e fatit

Ata me ngjyrë dhimbje

E me shkëlqim lumturie

Për ta ndërtuar shtëpinë e jetës…

/QendraPress.com/