Posta nis shpërndarjen e gjobave digjitale për shkeljet në trafik – hap i rëndësishëm për sigurinë rrugore

                         Posta e Kosovës ka bërë të ditur se ka nisur shpërndarjen e gjobave digjitale për shkeljet e trafikut, një iniciativë e rëndësishme që rrit sigurinë dhe përgjegjësinë në rrugë.

Në njoftim thuhet se ky hap modernizues e bën procesin më të shpejtë dhe më të thjeshtë për qytetarët, duke siguruar një menaxhim efikas të detyrimeve të tyre.

“Gjobat dërgohen drejtpërdrejt në adresat e qytetarëve, duke ofruar një mundësi më të përshtatshme dhe më të thjeshtë për të realizuar pagesat.

Për më tepër, qytetarët mund të paguajnë gjobat në çdo zyrë postare të Postës sē Kosovës, duke u dhënë fleksibilitet dhe komoditet. Ky shërbim inovativ mbështet angazhimet e Policisë së Kosovës dhe të komunave, duke kontribuar në një trafik më të sigurt dhe një mjedis më të rregullt. Ky është një hap përpara në krijimin e një infrastrukture më të sigurt dhe më të besueshme për të gjithë qytetarët”, thuhet në njoftim.

Ndryshe, ditë më parë Policia e Kosovës kishte bërë të ditur se nga 3 prilli do të fillojë dërgimi i gjobave të trafikut në adresë të pronarit të veturës për kundërvajtjet e identifikuara përmes kamerave dhe radarëve.

Përmes një postimi në rrjetin social në Facebook bëhet e ditur se gjobat do të dërgohen tek kundërvajtësit përmes Postës së Kosovës dhe përmes platformës e-Kosova.

“Çka duhet të dini? Pronari i automjetit do të pranojë gjobën në adresën e tij. Nëse ai nuk ishte drejtuesi i mjetit në momentin e shkeljes, është i detyruar të sigurojë të dhënat e shoferit. Mosdorëzimi i këtyre të dhënave sjell masa ligjore për personat fizik dhe juridik sipas nenit 254 të Ligjit nr. 08/L-186”, thuhet në njoftim.

Po ashtu sipas njoftimit bëhet e ditur se qytetarët kanë edhe lehtësira të cilat janë: Përfitojnë 50% zbritje në pagesë, nëse e paguani brenda afatit ligjor dhe kanë të drejtën e ankesës nëse nuk pajtoheni me gjobën. /Telegrafi/