Çaste poetike me poeten:-Eva Esat KACANJA

Po mendoj për Ty

————————

Kur mendoj për ty,

kohën nuk e njoh,

Edhe gjithçka tjetër

që mbulon ajo.

Strukem guvës sonë,

ku rrjedh ujë i shenjtë,

aty s’ ka jehonë,

Flas e dëgjoj vetë.

Ditë-netët rrëfej,

shiun e harruar,

Puthjet ku t’i gjej,

frymën e munguar.

Ku je?

Ku je dashuri?

Po mendoj për ty!

Ato që s’ thashë kurrë,

ëmbël përsëris,

Lotët përmbi gurë,

Si lule i rris.

Sa shumë që jetuam,

Dhe sa pak ne dy!!!

dita iku ditës,

Nata s’ mbylli sy…

Rrugën ku unë shkel,

askush s’e kupton,

dashuri e tillë,

Tjetër dimension.

Ku je?

Ku je dashuri?

Po mendoj për ty!

Nuk e harroj hënën,

i bëj fotografi,

ndoshta këtë hënë,

po mban edhe ti.

Ku je?

Ku je dashuri?

Po mendoj për ty!

/QendraPress/