Çaste poetike me poetin;-Miftar TËRSHNJAKU

Mall për vendlindjen

—————————-

Oh, sa kam mall të jem në vendet e mia,

Ku me shekuj lulëzoi Iliria,

Ku me lahutë trimat mbi maja e shkrepa

Këndonin me zemër këngë të vjetra.

Atje ku shqiponjat qëndrojnë mbi shkëmb e gur,

Ku valon krenar një flamur,

Atje ku jehon fjala shqiptare,

Atje ku vallëzohet vallja opojare.

Në vendet e mia ku pata qëndruar,

Ku me ujë etjen pata shuar,

Atje më shkon mendja ditë e natë,

Ku me shokë mësuam së bashku në klasë.

Ah, vende të bukura që i ëndërroj çdo natë,

Fusha me dele e qengja që vijnë pas,

Lumi me ujë të kthjellët e të kulluar,

Mbushur me fëmijë të lumtur e të gëzuar.

Më mungojnë livadhet me lule në pranverë,

Era e maleve që fryente herë pas here,

Më mungon cicërima e zogjve në agim,

Që zgjonte zemrën fare pa përtim.

Më mungojnë odat me fjalë burrërie,

Këngët e vjetra me fjalë trimërie,

Besa shqiptare që s’njihte tradhti,

Dhe dashuria për tokën e lirë.

Kur mbyll sytë, më shfaqet ai vend,

Me male e fusha që i kujtoj me mend,

Dhe lutem që një ditë prapë të jem në atë vend,

Pranë vendlindjes sime, pranë Plavës së shenjtë.

Amb. Miftar Tërshnjaku

/QendraPress/