Çaste me poetin;Muharrem ELEZKURTAJ

Rruga e mbarë, Dalan, Arditë,

Hektor, Unik e Etik!

—————————————–

S’kam çka t’ju jap me vete…

Sot u bëra i varfër shumë.

Lotët s’mund t’i merrni dot,

ju rëndojnë sa një lumë.

Zemrën duhet ta mbaj për vete,

për t’u përballur me mallin,

me vetminë e me fajin.

Shpirtin po jua jap,

por s’di a ju duhet…

shumë është i vrarë.

E mendjen do ta ruaj

për t’i numëruar ditët

në kalendar.

Me vete po jua jap

një grusht dhe…

Sa herë të ligështoheni,

forcën aty do ta gjeni.

Sa herë të ndiheni të vetmuar,

shpresën për t’u kthyer

aty të mbjellë do ta keni.

Edhe këtë trastë merreni me vete,

për hatrin tim.

Me ca libra shqip të mbushur do ta keni.

Sa herë t’ju marrë malli

për gjyshin e gjyshen,

hapeni trastën…

dhe mes atyre faqeve

aromën tonë do ta ndjeni

/QendraPress/