Çaste poetike me poeten;-Anila TOTO

Tetori Roze

————————

Ti motra ime lart në qiell

Që dhimbja të është lehtësuar

Që natën ti më bëhesh diell

E ditën, hëna e munguar.

Më ndjek nga pas një ndjenjë e butë

Që kohët ty t’i la në mes

Nga toka dhimbja u shkëput

E dritë t’i ktheu lart në qiell.

Një shoqe e kam në dhe të huaj

Lufton çdo ditë aty për jetën,

Por dhimbjet nuk e kanë lënduar

E fati i saj nuk e la vetëm.

Ja edhe një mike vjen nga larg

Pa flokë në kokë dhe e tjetërsuar

Me shumë krenari, por fjalëpak

Tregon se tashmë e ka kaluar…

Kudo në botë ka mijëra gra

Që në emër të jetës, Atit dhe birit

Luftojnë të fitojnë me shkencë e fat

 Sëmundjen e kancerit të gjirit.

Ne jemi femra, bija dhe gra

E mbajmë mbi supe jo vetëm jetën

Familjet tona do të vuajnë më pak

Me një kontroll mjekësor të vetëm.

/QendraPress/