Çaste poetike me poeten:-Donika Stasa DOMI

ME KË TË FLAS ?!

———————-

Më detyruan të iki …

nga sytë këmbët

të mar arratinë ,

përreth dëgjohen

gjithmonë e më pak zëra ,

e përtej portash…

heshtja kusarë

ka zënë pritë ,

dhe si korb i zi

ditënetëve nxin…

Ditë e re

më sjell të njëjtën pamje ,

rrugë që ofshajnë malluar

për mërmërima hapash ,

dyer gungaçe kërrusur

n’peshë drynash të rëndë ,

kufij sinorësh t’rrënuar…

mbetur si gjurmë e heshtur

veç n’historikë hartash .

Me kë të flas…

të tremb memecërinë

e orëve që më mpakin frymën ,

me kë

të shkëmbej cigaren ,

ditëve të vrenjtura

të kohës vrastare ,

ecejake t’përvuajtura…

fytyra pa motiv

që bota ju vjen përqark ,

buzëqeshja ka kohë

tatuazh luleakulli mbi buzë ,

dhe zemra…

brigjeve t’harresës

kërkon të mar hak .

Me kë…

me kë të flas ,

të shkarkoj kokën

ngarkuar me pse-të pafund ,

që rrëmujshëm

hartuan pyetësorin tim ,

n’zigzake rrugësh…

peshoreve të jetës

rëndon e shtrenjta ,

por vlerës së çastit…

vetë jeta

i dha më të madhin çmim ..

/QendraPress.com/