Çaste poetike me poeten ;-Tixhe Rexha GËRQARI

EKUILIBRI I JETËS

——————————–

Në çdo hap mes dritës e hijes,

jeta mban peshoren e vet,

njëra anë me ëndrra që fluturojnë,

tjetra me plagë që mësojnë si të qëndrosh drejt.

Në frymën mes dhembjes e gëzimit,

njeriu mëson artin e qetësisë,

si pema që përkulet në erë

pa e humbur rrënjën e dashurisë.

Balancë është kur hesht për të kuptuar,

kur fal pa u dobësuar.

Ekuilibri i jetës s’është as paqe, as luftë,

 as baraspeshë e përsosur,

por rruga që mëson çdo ditë

të mos jesh vetëm vullkan që shpërthen,

as gur që nuk lëviz,

por valë që di kur të qetësohesh,

dritë kur ka terr.

Ekuilibri është guxim —

kush di të qëndrojë drejt në fortunë,

ka gjetur dritën e vet.

Tixhe Rexha

/QendraPress/