Çaste poetike me poeten;-Violeta KADRIU

NËSE SONTE

———————

Nëse sonte të merr malli, i dashur

e kjo erë e ftohtë janari që po fryn të mallëngjen,

mos ngurro, eja,

krahëhapur zemra ime do të të presë

e syri im do t’ i thotë lotit -” S’ më duhesh, Ai po vjen”,

t’ua thejmë dryrët ndjenjave të shpirtit,

që ka shumë kohë na zhuritin plot zjarr,

ta ndalim e ta shkrijmë me dashuri

këtë të ftohtë e këtë të dimrit acar!

Nëse sonte i dashur, sadopak të merr malli për mua

mos përto, eja,

eja t’ i njomim dy palë buzë

që ka kohë kanë vënë shkrumb,

eja së bashku t’ i thajmë dy palë sy

që nga malli ka kohë derdhin lotë si lum,

e më thuaj siç më thoshe me aq afsh e zjarr dikur,

“E vetmja ime je ti e të dua kaq shumë!”

Nëse të merr malli sonte të dëgjosh këngë,

tinguj të ëmbël kitare, çifteli a violinë,

eja tek unë, rrugën e di i dashur,

së bashku me këtë fërfëllaz ere do të t’ thur melodinë,

do të t’ këndoj këngët që do

si më e mira krahëshkruar gjeraqinë,

prapë do të jem ajo që di të ta heq mërzinë ,

e do ta mbush prapë trupin e shpirtin tënd

me aromë trëndafili e dafinë!

Nëse të ka marr malli i dashur,

sonte poezi të lexosh,

eja, mos ngurro, e di se je trimosh mbi trimosh,

poezinë më të bukur për ty qëmoti kam thur,

vetëm shpalos gjoksin e zemrën time

aty e ke të ruajtur gravurë,

poezinë më të ëmbël e më të bukur për ne të dy

e kam ruajtur ndër shtatë palë dryrë , thellë në gji

në to ka shumë mall , dhembje e lot

por më së shumti ka zjarr, afsh e dashuri!

Nëse të merr malli sonte i dashur

të lexosh më të bukurin roman,

eja, ta shkruajmë e ta lexojmë së bashku

duke iu bërë njëri-tjetrit me mëndafsh jorgan,

duke i shtrënguar duart tona,

me afsh e drithërima zemre

me fuqi e njomështi burri

e ngrohtësi e butësi femre!

Nëse sonte të mërzit e të mërdhin,

kjo erë e ftohtë që po fryn e po thanë

eja, mos hezito i dashur,

të gjitha pengesat e hidhërimet lëri mënjanë,

xhelozitë të gjitha hudhi në oqean,

ta shkrijmë së bashku sonte

këtë të dimrit acar,

e ta kthejmë në natë të ngrohtë pranverore,

në livadh shtruar me lule e bar!

/QendraPress.com/