E diela poetike me poeten: Behare Daja KASA

 REALITETE TË TRISHTA

 ———————————————–

Duket kaq e trishtë sot kjo ditë

Edhe pse dielli shkëlqen në zenit.

Lypësit kanë zënë këmbëkryq trotuaret

E me duar të shtrira lusin:

– O Zot më ndih!

Qentë e rrugës bëjnë orgjia

E as që pyesin për sytë e njerëzisë.

Dikush nga frika u hedh për të ngrënë

E me bisht të syrit i ndjek në ikje.

Më tej një i dehur këngës ia nis

E hallet i mbyt në gotën e rakisë.

Për ca orë doemos do jetë shumë i lumtur,

Gjersa në realitet të kthehet sërish.

Duket kaq e trishtë sot kjo ditë

Edhe pse dielli shkëlqen në zenit.

Mbrëmja e vjeshtës mbytet nga lodhja

E prehrit të natës i shtrihet qetësisht.

 /www.qendrapress.com/