E diela poetike me penën e artë të shkrimtarit:Gëzim Ajgeraj
Shtatë poezi për të dielen artistike
Udhët
————————-
Shkojnë e vijnë s’ ndalen kryq e tërthor na bien
Në kthesën e parë mos na zënçin në të dytën
Me nga një trastë në dorë plot ëndrrat plot ikjet
Se kush më i pari i zuri e kund s’ u ndalën
Nuk i mban mend kush nëse ato erdhën e na gjetën
A në mos ne anatemuam veten në gozhdën e mallkimit
Etjen peng në të zënçin shkretuar t’ i kanë vatrat
Shteruar kanë fushat, sheshet e qytetet
Mjerë kush i ndoqi e i mori e zuri n’ thuan e mallkimit
Harrimi mbeti peng i pritjes te pragu i portës
Malli u bë largësi e s’ u panë më
Mbetëm në udhëkryqin e tyre e s’ u kthyem mëEcje veguese
———————
Dita e së nesërmes enigmë e re
Ardhjet plot prita asgjësë s’ i dihet
Në apoteozë kohe ardhjet nuk vijnë
Në mos çasti i fundit është ky që jemi
Apo tjetërsia diku ka vënë prita
Asgjë nuk i dihet s’ është në dorën tonë
Vegullisë së sotme mbytet zallahia
Një virus për kokë ligjëron harrimin
Kohë që kokonë kudo mbjellë trishtim
Lum kush zuri të sotmen, së nesërmes s’ i dihet
Besa e maleve
——————————–
Në litarin e fjalës e lidhën mendimin
Fjalën e Zotit ia ngurtësuan betimit
Pastaj s’ u dëgjua krismë, as fjalë, as dhunë
Qetësia ra në mes dhe koha dhe heshtja
Asgjë e ligë s’ i ndodhi as mortit e as varreve
Gurrat e zemërimit pushuan dhe hasmëria
Mbi gurin e paqes shtang qetësia
Duart e krimit shtangën tek shtegu i fjalës
Pritat s’ gjetën vend as kaçubat, as gurët
Ai që i pari këputi litarin e fjalës
Mbeti i pabesë për jetë të jetëve ndër gjaqe
Antiapoteoza e kohës
——————————————
T ’ i thurim himn kohës që koka kokonë
A ta ushqejmë mendimin me pelin motesh
Kur shpresat i kullosim lëndinave të shkreta
Me koka të thata e bajraktarë tek sheshi
U mbush kupa e ditëve tona
Uritur mbetën zogjtë e arratisë
Ku fjalamanët e pallateve
Na i ushqejnë me pelin ëndrrat
Në sofrën e thatë
A i bëhet amen kohës që vjell trishtim
E të lë pa pikë dielli mbi kokë
Kur njeriu pështynë mbi surratin e etnisë së vet
Medet halli
Ç’ vegulli e brishtë
Verbon mbi shpresën e së nesërmes
—————————————–Ditën kur të nisesh
————————————————
Atë ditë kur udhët të japin udhë
E të vjedhin bashkë me arkën e kujtimeve
T ’ i palosë një nga një ëndrrat e dështuara
Këngët e jetës të lëna në gjysmë
Dhe të nisesh shtigjeve të një ëndrre të re
Që s’di as vetë se në ç’ shteg të pret
Diku pritave të harruara të mallkimit
Ti tanimë je bërë fletë
E lojës së erërave në degën e thyer
E me furtunën e tyre t’i ngarkon ëndrrat
Udhëve të pakthimit
Poezia
——————————–
Nga koka nga shtati
E gdhendën poetët
Nuse e bënë
Për ditën e madhe
Dhe shpirt i dhanë dhe jetë
Nga shpirti i vet i etshëm
Ajo që frymëzoi jetën
Mbeti më e bukura
Lum kush e gdhendi
E i dha gjak e asht frymëzimit
Më të mirit nga më të mirët
T ’ i këndohet himni
Me mallin morëm bjeshkën nën këmbë
——————————————————-
Me mallin morëm bjeshkën nën këmbë
dhe bora tufa- tufa që s’i jepej diellit të prillit
horizonti më shkrihej përmallshëm dritëzave në sy
dhe pak shafran tek ndrydhja për sheqerin tim të tepërt, shtrëngoja nën dhëmbë
shkrumbi alpik tek me shkrihej në gjoks
nën freskinë e borës së bardhë të prillit mbi Sharr
eh, sa më qenka mbledhur ky mall i mallkuar si një topth
e po shkrihet përmbi tufat e borës këtu mbi Sharr
rënduaka, rënduaka sa bjeshka ky i djegshmi, imi mall
e shoh tek shkarkon lehtë e lehtë këtu përmbi Sharr
rëndon bash si ky gur i zi përpara syve të mi të përmalltë
tamam si ai gur kufiri që përtej Iliridën ma ndanë
pak përtej ç’më përmallë e çmallë një kambanë
blegërimat e njoma të qengjave dhe fyelli i një bariu m’atë anë
më trazojnë ca kujtime të një vargu të mikut të madh të pendës
dhe ca vargje për qengjin e vargut agollian
pa dashje dhe loti e përmallimit pikon nganjëherë
e bie mbi shkëlqimin e diellit të prillit plot shkëlqim
janë dhimbjet e udhëve të përmallta të dekadave alpike
që shkrihen tinëzisht nën qerpikun e syrit tim
hapat e mia ecin e ecin e s’di nga më çojnë
përtej bjeshkëve të mbuluara ende tufa – tufa me borë
këtë mall timin që ato ma trazojnë
dua ta shkrij si një dhembje shpirti e ta freskoj mbi to
Mes kufirit Kosovë – Iliridë, 24 prill, 2022