A priten largime të tjera nga Vetëvendosje?

                      Shefja e deputetëve të Vetëvendosjes, Mimoza Kusari – Lila, tha se asnjë deputet tjetër, përveç Haki Abazit e Fatmir Humollit s’e ka paralajmëruar largimin nga Vetëvendosja. Ajo tha se deputetët në grupin parlamentar të VV-së kanë shprehur mendimin e tyre për çështje të caktuara dhe se sipas saj, me ta ka komunikim normal.“Me asnjë deputet në kuvend s’kam probleme në komunikim. Asnjë s’e ka paralajmëruar largimin ose ka dhënë shenja të kushtëzimit me afate që i kemi pasur si tek rasti i Humollit”, tha Kusari – Lila në Klan Kosova. Tutje, ajo foli edhe për deputetët me qasje siç e quajti ajo “konservative”, për të cilët tha se “jemi pajtuar që të mos pajtohemi”.“Ka deputetë me qasje konservative në raport me vlerat fetare dhe si të tillë ata i kanë shprehur ato pa asnjë imponim ndaj të tjerëve dhe në temat e caktuara jemi pajtuar që të mos pajtohemi. Kur ka pasur tituj në media se ata mund të dalin si grup i veçantë ata kanë ardhur dhe janë mahnitur me atë se çka po shkruajnë mediat për ta. S’ka pasur drejtpërdrejt për asnjëherë kërkesë apo paralajmërim të largimit”, tha ajo.Kujtojmë se prej fillimit të kësaj legjislature, tre deputetë i janë larguar Grupit Parlamentar të VV-së. Bëhet fjalë për Doarsa Kica- Xhelili, Haki Abazi dhe Fatmir Humolli. Përderisa e para shkoi në LDK, Abazi e Humolli qysh prej largimit nga VV, janë pa grup parlamentar.