Çaste poetike me poetin;-Ali H. TAHIRI

LIRIA TË PËRQAFOJ

– Dëshmorit Demë Avdyl Shala –

———————————————-

Trimit nga Graboci i Pejës,

zemra iu bë flakë, prush e hi për liri.

Rrallëherë u lindin betejave ushtarë,

si Dema, për të mbetur i pavdekshëm në faqe lavdi.

Kur flaka e luftës filloi

ta digjte tokën gjithandej Kosovës,

trimi Demë Avdyl Shala,

plumbat e armikut i ndalte herë me gjoks,

 e herë në shuplakë të dorës.

Mbi çdo mund,

lirinë e Kosovës në shpirt e kishte të shenjtëruar.

Në lagjen Dardania III të Pejës,

nga dora hodhi bombat, shokët

për t’i shpëtuar.

Në vijën e parë të zjarrit,

jeta e tij u shua,

emri i tij u shkrua me gjak në fletën e historisë.

Ishte betuar pranë flamurit

për lirinë e tokave të gjithë shqiptarisë.

O trim Demë – Demushi,

iu bashkëngjite shtatë shaljanëve.

Ti mbete i pavdekshëm

në zemrën e çdo shqiptari.

Këtë trim të tetë, hero shaljan, e deshi

Atdheu, Liria dhe Altari.

Heu, Demë Avdyl Shala,

kurrë mos t’u kalbshin eshtrat.

Ty, liria e Kosovës,

në panteon t’i ruan sot e mot vlerat.

Ti u ngjite si flamur

në zemrën e çdo shqiptari.

Kurrë nuk do të shuhet emri yt, as liria,

se ti për të do të ngrihesh prapë nga varri.

Pusho tani me shokët dëshmorë të idealit,

i qetë.

Ti, tani, në majën e shtizës së Flamurit,

të Dardanisë së lashtë,

mbete hero i gjallë në dy jetë.

/QendraPress/