Çaste poetike me poeten;-Drita Rubjeka ZENELI

VJESHTA NË MUA

(E risjellë prej dikur)

————————————–

U nis kjo vjeshtë, u nis në udhën ciklike,

Të dimërojë me mua pranë oxhakut,

Të fundit gjethe, degëve të zhveshura mblodhi,

Si një zonjë e hijshme, bujti pranë pragut.

Në netët e gjata kur zjarri tretet ngadalë,

Prania e saj shtrin prarin mbi libra,

Në fletë shpupuris një psherëtimë të artë,

Si një rrëfenjë e zverdhur në papirusët e lashtë.

Më pas largohet, pa zhurmë e ndër shkallë,

Si mjegull që shpaloset mbi një liqen të qetë.

Unë mbetem me aromën e viteve në dhomë,

Dhe me ndjesinë ciklike, unë jam vjeshtë.

/QendraPress/