Çaste poetike me poeten;- Rudina PAPAJANI

ANATOMIA E NJË GËNJESHTRE

—————————————-

Ne e dimë.

E megjithatë, i lëmë karrigen bosh që të ulet mes nesh.

Ajo nuk vjen më me hundën e Pinokut.

Vjen me kostum të qepur nga bindjet tona,

me kravatë të lidhur nga frika se mos mbetemi vetëm.

E njohim aromën e saj.

Ka erën e shiut që nuk bie kurrë,

 të premtimeve që mbijnë vetëm në fjalime,

të duarve që përshëndesin lart dhe godasin poshtë.

Ne e dimë.

E shohim si ndryshon ngjyrë si kameleoni mbi trungun e interesit.

Dhe prapë i japim ujë.

Sepse nganjëherë gënjeshtra nuk jeton nga ai që e shpik.

Jeton nga ai që bën sikur nuk e sheh,

Kështu, çdo heshtje bëhet një tullë,

 çdo kompromis një dritare, derisa ndërtojmë një shtëpi të tërë

ku e vërteta hyn vetëm si mysafire.

Ironia?

Nuk është se na mashtruan.

Është se, duke e ditur mashtrimin,

 filluam ta quanim realitet. /QendraPress