Çaste poetike me poetin;-Agim DESKU

S’KAM EMËR TJETËR

——————————

Kthej fytyrën kah lulet

që dielli t’mi lexojë sytë

Marr trenin e fundit të natës

ta ndajmë bashkë heshtjen dhe dritën

Vapën e zemrës ta freskojmë me lutje

Pa i zgjuar heshtjet nga gjumi

Me ëndrra të ecim deri në agim

Aty ku dashuria bëhet lumë shpirti

S’e di nëse deti na xhelozon

Ndoshta na ruan si fshehtësi e tij

Për besë s’kam emër tjetër në jetë

Veç atij që ma njohin lulet në maj

Nuk e ndërroj për asnjë çmim bote

As kur dehem nga fjala e lirë

Fuqinë e diellit e mbaj në zemër

Si zjarr që nuk shuhet në errësirë

I njoh ata që më urrejnë

Pse e mbaj fjalën si besë

Kjo më mban gjallë ndër njerëz

Më bën të ec përballë çdo stuhie

Ndoshta një ditë koha

Do të më shpallë hero të kujtesës

Sepse s’kam frikë nga zezonat e natës

Unë e vazhdoj ditën me diellin në zemër

/QendraPress/