E diela me poetin;Sabit Rrustemi

VETËM ERA E TRUPIT TËND

– variant –

Dua ta harroj erën

që fryu e shfryu pyllnajës sate

e i zdeshi pullazet e mia

erën që na i thau buzët

nëpër porta

dritare

gozhdave të ngulura trarëve të pritjeve

aty ku shpresa nuk vdiç as e fundit

Ti u shfaqe më në fund

përmes një reje

hapësirave të etura

trupit tim të përndezur

dëshirat e pathëna ndjeva

si pikuan mbi mua

pikë pikë deri në rrënjë

dhe atë avull kënaqësie

kur gufoi trupit Tënd

e ngjitej kodrave të zhveshura

kah ato mollëza kuqrreme

e pashë

Po tash

vetëm era e trupit tënd

depërton  hapësirave të mia

e shtrihet luginave të thella të shpirit

duke i zbutur rreshkat e mallit

e tëra e ëmbëlt

e dridhshme

e ëndërrt

si buzët tona

( 19 shtator 2014 – 19 shtator 2020 )