E diela me poetin :Faruk Tasholli
UNË JAM MIRË
KUR ËSHTË KEQ SHQIPËRIA
( Poezi satitike)
Ç’dërdëllin ndër dhëmbë politiko-mafia:
Unë jam mirë kur keq është Shqipëria!
Unë hyj e dal Europës si peshku në det
Gjithkush duhet ta gjejë rrugën e vet!
Kot e kanë me mua klosharët e Parisit
Kur plantazhe m‘i quajnë parcelat e kanabisit,
Tjetër është Parisi krejt tjetër Lubjana
Ndryshe gatuajnë bukën Prishtina e Tirana;
Unë luaj si me fëmijët krejt hopa-hopa,
Kur e shtyej luhajën kot nga Europa,
Unë dal në ekran e flas me emocion
Ç’faj kam që ky popull patriotizëm kërkon?!
Pse më thonë me zjarr se jam pa skrupull
Ka shekuj që peshku zihet në ujin e turbullt,
Kohë kur leku kapet me rrjetat e pushtetit
Lëreni akademikët kafeneve të qytetit,
Të bëjnë filozofi, të shohin histori me sy katër
Unë ua trazoj mendjen me kazmë në Teatër!
Kot ma nxjerrin sentencën si lulen pas ngricës
Se ç’ka thënë ai dykoburësi i Mitrovicës?!!!
Tash është kohë tjetër ndryshohet historia
Unë jam i fortë kur gjunjëzohet Shqipëria!
A s‘ma thuani ju ç’sundimtar në botë
Sa e mbajti fronin përballë popullit të fortë?
Ç’kanë këta patriotët që m’i trazojnë herdhet
Të mos isha unë, Europës, ç’do bënin bordellet?!
Lëreni bre se nuk jetohet me vargje poetësh të ngratë:
„O malet e Shqipërisë“ a „ku me njeh dhe gur i thatë!“
S’ka rëndësi ç’del nga portet ç’shahet n‘ Parlament
Populli han lajme ne grumbullojmë lekë,
Shteti bën prokurori e gjykata për t’thënë,
Po ku ka drejtësi të luhet ajo nënë,
Prandaj dërdëllis ndër dhëmbë:“Rroftë anarkia,
Se unë jam mirë kur është keq Shqipëria!“
