fryma Fryma poetike me poeten;- Deta GASHI/Edhe një poezi nga : DEA /

Përndjekësit e padukshëm-

———————————————–

Para se largimi im të zbehë sytë që djegin shpirtra

E të t’shqetësoj mendimi se përqafova vetminë

Ty po ta besoj të ëmblën fshehtësi

Kështu ndoshta do të vraposh aq shpejt

Sa tokës do t’i lësh shenja me fortësinë e hapit

Trazirë mendimesh ke për të mirëpritur

Në boshllëqet e trurit të pavlerë

Ndërsa yjet tashmë kanë vdekur

Asnjë diell s’do të ketë kurajo ta shfaqë veten

Askush nuk e do dritën

Askush nuk e do ngjyrën e artë

Rrezet e ngrohta ngjallin urrejtje

Sepse ngjyrat nuk i takojnë më botës

Tmerr i jetuar në zgjuarsi të plotë

Vetëm për ithtarët e së bukurës

Asaj që iu bënë vartës duke hamendësuar

Se me të vërtetë aty qëndronte hijeshia

Por tash ky tmerr si do të jetë

Për krijesat e refuzuara të errësirës

Në të cilën gjetën prehje pas dëbimit

Nga gjiri i mendjendriturve të vetëshpallur

Kjo është pra fshehtësia e ëmbël

Arsyeja pse sot largimi im sytë do t’i zbehë

Ata sy që etshëm dogjën mijëra shpirtra

Kur shtegun e sakrificës do ta kaloj

Mua do të më bekoj verbëria

Pas natës do të vijë nata

E do të bëjmë dashuri me aromën e shkrumbit

Që buron nga pastërtia e esencës së djegur

Kush i vë flakën ëndrrës plot jetë

Shpëtimin do ta gjejë tek makthi përtej mureve

Ashtu si ne që braktisëm trupat

Për t’u bashkuar përjetësisht me botën e hijeve

/www.QendraPress.com/