Fryma poetike  me poetin:-Mehdi KRASNIQI

SHPËRFILLJE

—————————–

Më ra një pikë në fjalë

dhe sythi i saj

u prek në shpirt

Ia pashë hijen që i doli nga lëkura

dhe u mbështet për muri

si dashnore e përzënë pas puthjesh

në orë të vona të natës

ku të gjitha dyert e zemrës janë mbyllur

dhe Zoti ka fjetur në divan.

Këmishën e shpërthekuar

nxjerr nga krahët,

varur mbi supe

si degë molle e thyer në pikën më të dobët

ia pashë dhe rënien pa zhurmë

vetë unë heshta duke ngrënë me sy uritshëm

trohat e vetmisë së saj

përtej kufirit të fjalës

pikës së rënë në pikë pas shkronjës së fundit.

I rashë telave të kitares

sikur udhës

këmbë,

këmbë pas këmbe

asgjë më pak

melodi e heshtur

shkelur pentagrami i saj,

shkelur gjer në rrënjë

Në pjesën e prapme të mallit

një dhomë kujtimesh zbrazur

gjurmë letrash grisur imët

kocka fjalësh, shenja puthjesh

qëllimshëm lënë pasdore…

Pika e rënë

shpërfillshëm

mund të bie

edhe nga rënia

M.K

/QendraPress/