Çaste poetike me poeten;-Zanë MALI

Dritë në mishin tim

———————————-

Sikur jeta të kish tënden lëkurë

do më zhvishej çdo agim

çdo mbrëmje do më futej nën mish

si një gjuhë zjarri që s’njeh falje

Më shikon…

rrëshqet thellë në kockë

frymë që kërkon rrugën për të rilindur

shpërthim drite nën peshën e puthjes sate

Kur më prek

bëhesh qiell që më copëton me rrufe

më ngërthen si një uragan i shenjtë

e kofshët këndojnë gjuhën tënde si himn drite

Nuk më thërret në emër

me klithmën që të del

kur më ndjen duke u hapur si lule e egër

nën gjuhën tënde që pikon epsh

Unë s’jam më grua

jam faltore që merr flakë

kur më vjen i zhveshur nga fjalët

i mbuluar veç me urinë për mua

Lëre veten

në mua si misionar i një feje të ndaluar futu

ku çdo shtytje është lutje

çdo krismë shpirti

amen që më ngrihet në zë

Më shijo si verë e pjekur nën

diellin e barkut

më thith lëngun si të ishte i shenjtë

burim loti bëhesh

më bën të qaj ndërkohë që digjem nga brenda

Kjo nuk është më dashuri

është

dritë që më nxjerr përtej jetës

vetëm nga një natë që më fale ti

/QendraPress/