Çaste poetike me poeten:-Elmije AJAZI

NËNA QË RRITI LIRINË

—————————————-

Mos e quani thjesht skulpturë…

Ajo është frymëmarrja e gurit

për një emër të shenjtë: Zahide Jashari.

Nënë që i dha Kosovës jo vetëm një djalë,

 por një epokë.

Nënë që qëndroi, kur shtëpia digjej

dhe pushka e lirisë nuk ndalej.

Nënë që nuk i bëri be vdekjes, por e rriti

jetën me gjakun e djemve të saj.

Ajo nuk bërtiti, as nuk vajtoi me zë ,

ajo foli me heshtje që dridh zemrat edhe sot.

Po të kishin gurët zemër, do dridheshin para saj.

Po të flisnin malet, do e thërrisnin: “Nënë e të gjithë neve.”

Ndoshta sytë e saj nuk qajnë më,

por ne jemi lotët e saj , të mbledhur në liri.

Jemi amaneti që mbijetoi, sepse ajo nuk u ligështua.

Sot, një skulpturë që duket e heshtur,

por në të fle një histori që rënkon.

Një kujtim që nuk vdes.

Një falënderim që kurrë s’mjafton.

/QendraPress/